Bakı Dövlət Universitetinin jurnalistika fakültəsinin 2-ci kurs tələbəsi İlkin Quliyev universitetin kitabxanasında kitab almaq üçün uzun bir prosesin tələb olunduğundan şikayətlənir.
Kitabxana qeydiyyatından keçmək lazımdır. Bunun üçün tələbə bileti, şəxsiyyət vəsiqəsi lazımdır. Bir neçə blank var, onları doldururuq və bizim üçün kartoçka ( kart-m.) açılır. Hər fakültə üzrə günlər var. Məsələn, mən jurnalistika üzrə təhsil alıram. Bizdə yalnız I və IV günlər gedib ordan kitab götürmək mümkündür.
Bakı Slavyan Universitetinin Beynəlxalq Münasibətlər fakültəsinin IV kurs tələbəsi Pərvin Əliyev isə təhsil aldığı universitetin kitabxanasında elmi, siyasi, XXI əsrin bədii ədəbiyyatının çox nadir tapıldığını deyir.O, bunun səbəbini kitabların azlığında və tələbələrin götürdükləri kitabları gec təhvil verməsində görür. Pərvin eyni zamanda əlavə edir ki, kart sistemində kitabın hansı tələbənin apardığını və nə vaxt qaytaracağına nəzarət etmək də çətindir.
Elə kitablar olur ki, həmin kitabın müəllifi azərbaycanlıdır. 5 dənə-10 dənə kitabı bağışlayır universitet kitabxanasına və o kitab götürülür və həmin tələbə də 4-cü kursu qurtarmamış o kitabı qaytarmır. Mənim özümdə də elə kitab var ki, 1-ci kursdan götürmüşəm hələ qaytarmamışam, ona görə kitab çətin tapılır.
Təhsil üzrə ekspert Mürsəl Əliyevin fikrincə isə universitet kitabxanalarında kitabların tapılmamasının əsas səbəbi müəlliflərin kitabları kitabxanaya verməməsindədir. Ekspert deyir ki, müəllimlər öz kitablarını kitabxanaya bağışlamaq əvəzinə tələbələrə satırlar və nəticədə kitabxanada kitab tapılmır.O, universitet kitaxanalarının elektron sistemə keçməməsinin də belə problemlərə zəmin yaratdığını deyir.
Başqa bir problem sırf elektron sistemə keçirilməməsidir. Daha yaxşı olardı ki, tələbələr birbaşa sayt vasitəsiylə və yaxud elə universitetin kitabxanasına yaxınlaşmaqla elektron formada kitabları ala bilsinlər. Bunlar müəyyən bir sistemə salınmalıdır. Mənə elə gəlir ki, bu sahədə çətinləşdirməmək üçün sadəcə olaraq Türkiyə təcrübəsindən, Rusiya təcrübəsindən istifadə oluna bilər.
Bakı Dövlət Universitetinin elmi fondunun işçisi Züleyxa xanım isə universitetdə bir müddət öncə elektron sistemin tətbiqinə cəhd edildiyini, lakin sistemin şəbəkələşdirilməsində problem olduğundan işin yarıda qaldığını deyir.
Elektron qoymuşdular bizdə, onunla yazırdıq, onunla verirdik. Obşi (ümumi-m.) birləşdirəndən sonra nəsə xarab oldu. İndi kartoçka sistemiylə işləyirik, gələcəkdə verəcəyik elektron. Bütün kitablar axı salınmalıdır elektrona ki, ordan istifadə edə bilsinlər.
Bakı Slavyan Universitetinin kitabxana müdiri Səmayə Əliyeva isə hazırda mövcud olan kartla kitab əldə etmə sisteminin onların işinə mane olmadığını deyir. Səmayə xanımın fikrincə tələbələr kitabları vaxtında qaytarmadıqda kitab çatışmazlığı problemi yaşanır, bu isə elə tələbələrin özlərinə ziyan edir.
Kitabxana yaranandan bizdə kartoçka sistemidir. Mən deyərdim elə bir fərqi yoxdur. Elektron sistem düzdür, indi, bu dəqiqə gündəmdədir. Gənclər istəyir hər şey təzə olsun, hər şey müasir olsun. Amma elektronun da çətinlikləri var. İşıq məsələsi var, itmə məsələsi var. Hələ ki, bizdə belə vacib deyil. Bizim işimizə mane olmur köhnə qayda. Amma sözsüz ki, müasir dövrlə ayaqlaşmaq lazımdır, biz onu eliyəcəyik.
Xəzər, Qərb, Qafqaz kimi bir neçə özəl universitet isə artıq elektron kitabxana sistemin tam tətbiqinə keçib.
Qafqaz universitetinin Beynəlxalq münasibətlər fakültəsinin 3-cü kurs tələbəsi İlkin Əliyev bu sistemdə tələbələrin özlərinin kitabları kompüterlə axtardığını və bütün prosedurun elektron aparıldığını qeyd edir.
Kitabxananın girişində bir neçə komputer var, o, komputerlərdən də özümüz girib kitab axtara bilirik. Elektron sistemdə qeydiyatda görsənir ki, hansı kitabımız var, hansı kitab almışıq, nə vaxt qaytarmışıq, gecikmə halları olub, yoxsa, olmayıb.
Qafqaz Universitetinin kitabxana müdiri Mehmet Ali Ceyhan, bu sistemdə həm universitet həm də dünya üzrə digər kitabxanalara giriş olduğunu deyir. O, həmçinin, burada kitabları istər əyani, istərsə də elektron variantda əldə etməyin mümkünlüyünü nəzərə çatdırır.
2009-cu ildən bu tərəfə elektron sistemlə xidmət göstəririk. Bu sistem istifadəçilərin işlərini daha da asanlaşdırdı. Evindən çıxmadan, internet vasitəsiylə kitab sifarişini edir və artıq universitetə gələndə o kitab o tələbə üçün kitabxana işçiləri tərəfindən hazırlanmış olur. Burada gözləmədən kitabını alır.
Hazırladı: Nuranə Rəhimova