Noyabrın 10-da NATO öz tarixində ilk dəfə alyansa üzv olmayan ölkənin ərazisində-Gürcüstanda yerüstü hərbi təlimlər keçirəcək.

Bu barədə GSR.fm-ə Atlas Araşdırmalar Mərkəzinin rəhbəri Elxan Şahinoğlu müsahibə verib. O bildirib ki, təlimlər zamanı Gürcüstan ordusunun peşəkarlığının artırılmasına çalışılır:

“Gürcüstan NATO-ya üzv olmaq istəyir. Bu Saakaşvilinin dövründə də belə idi, indi də belədir. Sadəcə NATO üzv qəbul etmir. Buna baxmayaraq, Amerika və digər qərb ölkələri NATO çərçivəsində Gürcüstanla əməkdaşlığı genişləndirirlər. Nəinki, noyabr ayı, hər il Gürcüstanda NATO təlimləri keçirilir. Amerikalı hərbiçilər Gürcüstana gəlirlər və təlimlər zamanı Gürcüstan ordusunun peşəkarlığının artırılmasına çalışırlar. Bu, Gürcüstanın NATO-ya üzv olması yolunda bir mərhələdir. Təlimlərin region üçün əhəmiyyətini söyləmək çətindir. Çünki Gürcüstandan fərqli olaraq Ermənistan Rusiyanın hərbi-siyasi müttəfiqidir. Azərbaycan isə  neytral siyasət yürüdür. NATO üzvlüyünü qarşısına hədəf qoymayıb, o cümlədən Rusiyanın formalaşdırdığı Kollektiv Təhlükəsizlik Müqaviləsində də yer almır. Düzdür, Azərbaycanın da NATO ilə sıx əməkdaşlığı var, ordunu NATO-nun standartlarına uyğunlaşdırmağa çalışır. NATO generalları da zaman-zaman Azərbaycana gəlirlər. Azərbaycanda NATO-nun birbaşa təlimləri keçirilməyib. Düşünürəm ki, Gürcüstanda hərbi təlimlərin keçirilməsi Rusiyanı qıcıqlandıracaq”.