İdman, Reportaj, ZZ-Manşet

“…, həmin futbolçunun legionerlik karyerası uzun sürməyəcək” - Reportaj

Azərbaycan futbolçuların xarici klublarda çıxışı birmənalı qarşılanmır. Portuqaliyanın “Boavişta” klubunda forma geyinən millinin qapıçısı Kamran Ağayevin sözügedən klubla müqaviləsinin vaxtından əvvəl (17 aprel 2017) bitirilməsi ilə bu məsələ bir daha gündəmə gəldi.

GSR.fm xəbər verir ki, Azərbaycan futbolçularının legioner karyerası barədə KİŞİ Magazine futbol üzrə ekspertlərin fikirlərini öyrənib.

  “CBC Sport” telekanalı Xəbərlər Departamentinin şef-redaktoru Rövşən Binnətli bildirir ki, indiyə qədər legioner həyatı yaşayan Azərbaycan futbolçularının statistikası aparılsa, heç birində diqqətçəkən uğur yoxdur:

“Bu məsələdə əsas səbəb futbolçuların məqsəd aydınlığı və istəyinin olmamasındadır. Haradasa Qurban Qurbanovun aşağı liqada da olsa, oynadığı müddət stabilliyi ilə diqqət çəkə bilər. Digər futbolçulara baxdıqda isə əvvəlcə yaxşı vədlər verirlər, lakin sonradan məlum olur ki, həmin futbolçunun legionerlik karyerası uzun sürməyəcək.

Ən səs-küylü keçidimiz Kamran Ağayev olub. Ona ümidlərimiz çox idi, deyirdik ki, karyerasını artıq orada davam etdirəcək. Onun “Boavişta”da çıxışı cəmi 14 oyun çəkdi.”

Azərbaycanın əməkdar futbol məşqçisi Ağasəlim Mircavadov isə futbolçunun imicinin milli komandadakı oyunu ilə formalaşdığını deyir:

“Yerli futbolçular yüksək səviyyədə oynamalı və yaxşı agentləri olmalıdır. Agentlər də onları klublara təqdim etməlidir. Təqdim edilə bilmək üçün isə oyunçu öz üzərində çalışmalı, yığma komandada yaxşı çıxış etməlidir. Buna görə də, xarici klublardan təklif ala bilərlər.

Hazırda xaricdə Budaq Nəsirov, Emin Mahmudov və Ramil Şeydayev kimi futbolçularımız çıxış edir. “

Rövşən Binnətli maliyyə məsələlərinin futbolçular üçün önəmini qeyd edir.Yerli futbolçuların legioner həyatı yaşamaqda maraqlı olmadıqlarını vurğulayır:

“Çünki öz ölkəsində xaricdə qazandığından daha çox qazanır. Pul məsələsi hər şeyi üstələyir. Amma ölkənin adını tanıtmaq və peşəkar futbolçu kimi yetişmək  önəmlidir.

Bizim xarici klublarda yaxşı oyunçularımız olsa, onların hazırlığı daha yüksək səviyyədə olar, milli komanda məşqçisinin seçim imkanları artar.Məsələn, biz milli komanda üçün bir normal hücumçu tapa bilmirik. Məşqçilər,mütəxəssislər futbolçuların peşəkar karyerasının inkişafını tənzimləməlidir.”

Ağasəlim Mircavadov isə legioner olmaq üçün futbolçularda istəyin olmasını vacib sayır:

“İnkişaf etmək, karyerasını yüksək səviyyədə davam etdirmək üçün futbolçularda istək olmalıdır. Maddiyata fikir verməməlidir.Yaxşı oynadıqca imicini artıracaq və imicinə görə də, maddi vəziyyəti yaxşılaşacaq.

Çox ölkələr Azərbaycandan futbolçu istəmirlər.İtaliya,İspaniya,İngiltərə,Fransa kimi ölkələr.Kiçik ölkələrin futbolçuları xaricdə oynamağa daha tez gedirlər.18-19 yaşlarından.Bizdə isə,yenə də qeyd etdiyim kimi,istək yoxdur.”

 

  “Azad Azərbaycan” telekanalının idman xəbərləri aparıcısı Sənan Şəfizadə uğurlu legioner karyerası üçün yerli futbolçularda ustalığın olmasını vacib sayır:

“Yerli futbolçuların xaricdə çıxışını dəyərləndirmək çətindir. Parlaq legioner karyerasıyla öyünə biləcəyimiz futbolçumuz yoxdur.2-3 futbolçumuz xaricdə oynayır.Onlar da hələ bizi sevindirmir.

Bu gün futbolçularımızın reklamı zəifdir, çünki reklam etməyə səbəb azdır. Bakıda yaxşı müqavilən varsa, daha yaxşısını imzalamağa çalışmalısan. Bizimkilər kənarda 5-ci olmaqdansa, vətəndə 1-ci olmağı üstün sayır.

Legioner ölkə futbolunun, millinin üzüdür. Hazırda vaxtı ilə xaricdə ölkəmizi layiqincə təmsil edən Vəli Qasımov, Nazim Süleymanov, Qurban Qurbanov kimi futbolçularımız yoxdur.

Sənan Şəfizadə qeyd edir ki, Azərbaycanlı futbolçular legioner karyerası yaşamasa, inkişaf olmayacaq:

“Vaxtı ilə Rauf Əliyev, Vaqif Cavadov, Əfran İsmayılovun Avropa meydanlarında çıxış edəcəyi gözlənilirdi. İndi artıq bizimkilərə təklif gəlmir. İstərdim yaxşı legioner karyeraları olsun. Biz də onlara görə, xarici klublara azarkeşlik edək.”

Mütəxəssislərin fikrincə, ölkə futbolunun inkişafında xarici komandalarda çıxış edən futbolçuların xüsusi rolu var. Onlar hesab edir ki, yerli futbolçuların başqa ölkələrdə  qazandıqları uğurlar uşaq və yeniyetmə futbolçuların da həvəslənməsinə və daha böyük nailiyyətlər əldə etmələrinə stimul verə bilər.

Hazırladı: Nicat Məmmədov

Öncəki xəbərNövbəti xəbər