28 oktyabr – Beynəlxalq Animasiya Günüdür. Bu barədə GSR.fm-ə  Cəfər Cabbarlı adına “Azərbaycanfilm” kinostudiyasının direktoru, Azərbaycan Prodüserlər Gildiyası sədri Müşfiq Hətəmov müsahibə verib. O deyib ki, kinonun inkişafına dair prezident tərəfindən imzalanan dövlət proqramına əsasən bu sahədə bir çox layihələr həyata keçirilməyə başlanılıb:

“Bunlardan ən əsası Azanfilm  kinostudiyasının  müasir avadanlıqlarla təmin edilməsidir. Məhz bundan sonra yaradıcılıq məsələlərinin gücləndirilməsi üçün bir neçə mövzularda animasiya filmləri çəkilməyə başlanıldı. Bizdə animasiya üzrə mütəxəssislər hazırlanmadığına görə müsabiqə elan etdik və bu sahədə bacarığı olan 14-ə yaxın gənc Azanfilm kinostudiyasında əməkdaşlığa cəlb edildi. Hazırda onların 6-sı yeni layihə üzərində çalışırlar. Eyni zamanda ilk dəfə olaraq tammetrajlı animasiya filminin çəkilişinə başlanıldı.”

Müşfiq bəy onu da qeyd edib ki, Azərbaycanda filmlərin, eləcə də animasiyaların yayımı ilə bağlı çətinlik var:

“Biz artıq Milli Məclisə yeni kino qanun layihəsini təqdim etmişik. Qanun layihəsinə əsasən milli kino vaxtı nəzərdə tutulub. Məhz bu milli kino vaxtında çəkdiyimiz  cizgi filmlər, animasiyalar və yeni filmlər mütəmadi olaraq göstəriləcək. Əfsuslar olsun ki, tamaşaçılar animasiya filmlərinin çoxunu görmür və bu problem artıq qanun çərçivəsində həll edilməyə başlanılıb.”