Müsahibə, Siyasət, ZZ-Manşet

«Region ölkələrinin çətinlik çəkəcəyini təxmin etmək olar»

iran-uran-bayraqlar

ABŞ Dövlət Departamenti Donald Tramp administrasiyasının İranla imzalanmış nüvə razılaşmasını ləğv edəcəyi mümkünlüyünü istisna etməyib. 

Bu barədə GSR.fm-ə müsahibə verən politoloq Qabil Hüseynli bildirib ki, razılaşma ləğv edildiyi halda, Yaxın Şərqdəki münasibətlər daha da gərginləşəcək:

“Bir çox gözlənilməz hadisələr ola bilər. Çünki yeni administrasiyanın fəaliyyəti hələ başlamayıb və inauqurasiya mərasimi yanvarın 20-də həyata keçiriləcək. Yeni komanda bu günlərdə formalaşır, müəyyən bəyanatlar verirlər. Tramp seçkilər zamanı çıxışlarında da qeyd etmişdi ki, prezident olduğu halda, nüvə müqaviləsi ləğv ediləcək. Bu baş verərsə, gərgin olan münasibətlərdə Amerikanın daha fəal iştirakı tələb olunacaq. Müqavilə ləğv edildikdən sonra  İran yenidən nüvə tədqiqatlarına başlayacaq, uraniumun saflaşdırılması istiqamətində fəaliyyətini daha da genişləndirəcək. Bir sözlə, nüvə silahının yaradılmasına yaxın olan İran  bu silahı əldə etmək üçün var qüvvəsini sərf edəcək. İrana qarşı sanksiyalar gündəmə gələcək və bölgə ölkələrindən bu sanksiyalara riayət edilməsi tələb ediləcək. Doğrudur, əvvvəlki sanksiyalar dövründə Azərbaycan bu sanksiyalara tabe olmurdu. Yəni, İranla münasibətləri, ticarət əlaqələrini davam etdirirdi. Amma indi necə olacağını söyləmək çətindir. Sanksiyaların tətbiqi ticarət əlaqəsinə, iqtisadi-mədəni əlaqələrə təsir edir. Bu baxımdan, əlbəttə, vəziyyətdə gərginlik, şübhəlilik əlamətləri özünü göstərəcək. Hətta bir sıra asan həll olunan məsələlərin çətinləşməsi kimi vəziyyətlər meydana çıxa bilər. Məsələn, son vaxtlar İranla Azərbaycan münasibətləri xeyli inkişaf edib. Xəzərin statusunun müəyyənləşməsi istiqamətində müsbət addımlar atılıb və yaxın vaxtlarda bu mövzuya dair Astana şəhərində yekun müqavilənin imzalanması gözlənilir. Bütün bu münasibətlər fonunda region ölkələrinin  çətinlik çəkəcəyini təxmin etmək olar”.

Öncəki xəbərNövbəti xəbər