Cəmiyyət, GSR fm, Reportaj, ZZ-Manşet

“Tarix dərsləri muzeylərdə təşkil olunmalıdır”

Muzeylər tarixi, elmi, bədii, mədəni dəyərlərə aid əsərləri və əşyaları cəmləyib qoruyan və onları ictimaiyyət üçün əlçatımlı edən məkanlardır. İctimaiyyət üçün fəaliyyət göstərən bu məkanlara marağını Bakı sakinləri belə ifadə edir:

– Ən son keçən yay Heydər Əliyev muzeyində olmuşam.

– Əslində 7-ci sinifdə getmişəm. Daha sonra getməmişəm.

– Nəsə marağımı çəkmir. Heç getməmişəm. Getməyi fikirləşmirəm. Mənə maraqlı deyil.

– Ədəbiyyat muzeyində, tarixi muzeylərdə olmuşam. Sahildə nümayiş olunan xalça muzeyinə də getmişəm. Burada milli xalçaları nümayiş etdirirlər.

– O sahəyə marağım yoxdur. Muzeyə, keçmişdəki nə iləsə maraqlanmağa marağım yoxdur.

mehri-muzey-2

Şəhər sakinlərindən fərqli olaraq muzey rəsmiləri muzeylərə yetərincə maraq olduğunu vurğulayırlar. Vaqif Musatafazadə ev muzeyinin direktoru Afaq Əliyeva muzeyə giriş pullu olsa da, bunun əhalının marağına mane olmadığını bildirir:

“Muzeydə çox qonaqlarımız olur. Muzeyə turistlər, çox adamlar gəlir. Çünki Vaqifi xalq çox istəyir. Muzeyə giriş pulludur. Biletlərimiz də var”.

Tahir Salahov ev muzeyinin direktoru Səadət Mirzəyeva isə muzeyə daha çox valideynlərin uşaqlarını gətirdiyini bildirir:

“Şəhərimizin qonaqları, axır vaxt yerli camaatın da axını çoxdur. Tələbələr, yerli camaat ailəvi gəlirlər, ata analar uşaqlarını gətirirlər”.

mehri-muzey-1

 Abdulla Şaiqin ev muzeyinin elmi işçisi Günel Əsədova muzeyə maraq cəlb etmək üçün fərqli üsuldan istifadə etdiklərini deyir:

“Biz axır vaxtlar  uşaqlarla müqavilə bağlayırıq. Məktəblərə gedirik, turizm idarələriylə müqavilələr bağlayırıq. Turistlər bir o qədər də  müraciət etmirlər. İçəri küçədir, çox yol kənarı deyil, çox görülmür.

Mədənişünaslıq üzrə elmi metodiki mərkəzin mədəniyyət təsisatları üzrə tətbiqi-tədqiqatlar şöbəsinin əməkdaşı Aygün Balabəyova əhali arasında muzeylərə marağı artırmağın yolları barədə məlumat verir:

“İlk olaraq aşağı yaş qruplarından, məktəbəqədər dövrdən başlanmalıdır. Məsələn, tarix dərsləri muzeylərdə təşkil oluna bilər. Muzeyin əməkdaşları muzeyin təbliği məqsədi ilə məktəbdə məktəblilərlə dərs proqramı hazırlaya bilər. Tələbələri, gənc yeniyetmələri müasir dövrdə texnologiyalar daha çox cəlb edir. Buna görə də hesab edirəm ki, muzeylərin texnologiya ilə təmin olunması məqsədəuyğun olardı. Bu zaman bu ziddiyyətlər aradan qalxacaq və muzeydə ziyarətçi artacaq. Təqvimdə mövcud olan əlamətdar günlərlə bağlı tədbirlər həyata keçirilməlidir”.


Hazırladı: Mehri Əliyeva

Öncəki xəbərNövbəti xəbər