Bloq, ZZ-Manşet

Toydan soyudan adətlər - Bloq

sabinaMəşhur filmdə deyildiyi kimi “Xalqımın toy kimi bir adəti var”.  Maraqlıdır bəs toylar kimi o prosesdə həyata keçirilən adətlər insanlara necə təsir  göstərir? Deyərdim ki, bəzi toy adətlərinə görə insan evlənmək də istəmir. Məsələn qab sındırmaq, yengə, qırmızı lent, gəlinə məcburi  bal yedizdirmək, gəlin görməsi və başqa bunun kimi insanı evlilikdən soyudan adətlər. Yəni bunlar olmasa xoşbəxt olmaq mümkün deyil mi? Məncə mümkündür.  Balı sevməyən bir qıza sırf gəlindir deyə məcburi yedizdirmək axı nə dərəcədə doğrudur? Və yaxud zorla qab-qacağı gəlinə sındırtmaq. Bu “gözəl” adətin əvəzinə həmin qabı elə cütlüklərə hədiyyə versələr daha faydalı olmaz mı? Nəinki qabı sındırmaq.

Adətlər sırasında gəlinin həvəslə aldığı, illərlə xəyalını qurduğu bəyaz gəlinliyə qırmızı lent taxılma mərasimi də vardır. Budur bütün o gözəlliyin məhv olduğu an… Və nəinki bunu taxmamaq, hətta bunun başqa rəngdə olması belə qəbuledilməzdir.Yəni bir qızın necə olduğu onun gəlinliyinə taxılan qırmızı lentindən mi bilinir? Əgər bu taxılmayıbsa və ya başqa rəngdə olarsa gəlinliyə layiq deyil? İnsanları əşyalara görə dəyərləndirmək nə dərəcədə düzgündür, görəsən? Əmin ola bilərsiniz ki, o lenti hər kəs gözdən pərdə asmaq üçün də taxa bilər. Həm pis,yaxşı qarşı tərəf bu qıza “həyat yoldaşım” deməyə razılıq verirsə, başqa insanların müdaxiləsi önəmsizdir. Bəlkə icazə verəsiniz insanlar öz qərarlarını özü versin? Yaxşı olmazdımı?

Ümumiyyətlə, evlilik iki nəfər arasında olan prosesdir  və zənnimcə, başqa birinin bu qərara qarışması bəlkə də cütlüyə edilən hörmətsizlikdir. Hələ mən toylarımızın  olmazsa olmazı hesab edilən  “yengə” adətindən danışmaq istəmirəm. Çünki üçüncü şəxsin cütlüklərin münasibətinə müdaxilə etməsi qeyri-etikdir mənim fikrimcə. Bəlkə bundan sonrasına qarışmayaq? Onsuz da bura qədər üçüncü şəxslərin müdaxiləsi yetərincədir. Daha dərinə getmədən demək istəyirəm ki, əgər  qəbuledilməz vəziyyət varsa cütlük özləri bunu həll edə bilərlər. Əlavə şəxslərin bir şey etməsinə ehtiyac yoxdur.

Cəmiyyətimizdə nədənsə, evliliyin iki nəfər arasında olması tez-tez unudulur. Pis ya da yaxşı hər iki tərəf bir – birini qəbul edibsə, kənar şəxslərə susmaq düşər. Əlbəttə ki ailələrin məsləhəti də lazımdır. Ancaq razılıq verildikdən sonra artıq hər iki tərəfə onların da müdaxiləsi sona çatmalıdır.

Son olaraq bir az da “gəlin görməsi” adəti haqqında danışmaq istərdim. Bu adət zamanı  insan həqiqətəndə evləndiyinə peşman olur. Gəlinin təcili otaqdan çıxmağa ehtiyacı olsa belə çıxa bilməz. Niyə? Çünki, adət belədir və ya burada kişilər var. Bu hamıdan gizlətdiyiniz gəlin dünən hərkəslə birlikdə oturan, oynayan qızdır. Nəyini gizlədirsiz ki? Dünən onsuz da gəlini görən insanların bugün görməməsi üçün məcburi otaqda saxlanılmağının axı nə mənası var ? Bəlkə icazə verəsiniz aylardır , hətta illərdir bir-birini gözləyən cütlüklər artıq evliliyin dadını çıxarsınlar. Evi, qızılları, əşyaları gözdən keçirən, dedi-qodu üçün məlumat yığmağa çalışan insanlarla vaxt keçirməkdənsə, yeni evlənmiş cütlüyə bir-biri ilə vaxt keçirmək daha xoş olar. Çox yox, bir az anlayışlı olun. Unutmayın evlilik iki nəfərin bir-birini sevib, güvənib birlikdə çıxdığı yoldur. İcazə verin sevənlər bu önəmsiz adətlərlə yorulmaq yerinə, bugünün həyəcanını yaşasınlar. Hər şey sadəcə onların istədiyi kimi olsun. Bu onların illərlə gözlədiyi gündür.Əmin olun onlara belə bir  şəraiti yaratmaqla xoşbəxt olmalarına daha çox kömək edərsiniz, nəinki “mentalitet”inizin əvəzedilməz adətlərini həyata keçirməklə.

Müəllif: Səbinə Qədirzadə


Yazılan fikirlər müəllifin şəxsi mülahizələridir, redaksiya bu fikirlərə görə, məsuliyyət daşımır.

Öncəki xəbərNövbəti xəbər

Şərhlər