Aktual

Yayda açıq satılan qidaların gigiyenası

Ramal Rəhimli:

– Peraşki yedim, peraşkidə sən demə köhnəymiş bilmirdim, üstündən biraz keçəndən sonra gördüm başım ağrıyır, qızdırma, ürək bulanması. Sonra həkim gəldi baxdı.

Müsahibim Ramal Rəhimli bir müddət əvvəl çöldə yediyi peraşkidən zəhərlənib. Qəbul etdiyi qidanın köhnə olduğunu bilmədiyini və həkimə müraciət edənə qədər zəhərləndiyinə əmin olmadığını deyir. Həkim evdə ilkin yardım göstərdikdən sonra onu halı yaxşılaşır.

Sabunçu rayonu 3 saylı kliniki xəstəxananın infeksion şöbəsinin müdiri Namiq Nəbiyev qeyd edir ki, küçələrdə satılan qida məhsullarının hazırlanmasında gigiyenik normalara tam əməl olunmayanda, zəhərlənmə halları çox ola bilər.

Namiq Nəbiyev:

–  Dönərdir və digər qidalar var ki, bunları küçələrdən alıb qəbul edə bilirlər. Yaxud da, qarpızdır, yemişdir, kimyəvi azot məhsullarından ki, istifadə edirlər dozadan çox olduğuna görə bu zəhələnmə halları baş verə bilir, təbii ki, insan da gigiyenik normalara riayət edə bilmədiyinə görə belə hallar baş verə bilir.

Səməd Vurğun bağı yaxınlığındakı peraşki dükanında işləyən adının çəkilməsini istəməyən satıcı xanım deyir ki, peraşki xəmirinin tərkibində maya olduğuna görə, onu çox saxlamırlar, tez bişirirlər. Bişirdikləri peraşkilərin də hamısını satırlar. Xanım onu da qeyd edir ki, sahə həkimləri tez-tez orada yoxlamalar aparırlar.

Satıcı:

–         Nə gedir onu bişiririk, getdikcə bişiririk, satıldıqca bir də bişiririk. Bişirib, yığmırıq, gələn klentə isti-isti nə vaxt istəsə. hər şey yerli yerində yoxlanılır, hər şey qayda qanunla hər şey sertifikatla.

Nəsimi rayon Gigiyena və Epidemioligiya Mərkəzinin Qida bölməsinin müdiri Əli Nadirov deyir ki, yol kənarlarında qida məhsulları bişirib satan mağazalara mərkəzin həkimləri nəzarət edir və tez-tez yoxlanışlar aparılır, lakin bununla belə hərdən zəhərlənmə hallarının olması mümkündür. Mərkəzin rəhbəri qeyd edir ki, vaxt keçdikcə belə stasionar yerlər də yığışacaq.

Əli Nadirov:

–         Heç kim qadağan edə bilməz ki, sən peraşki bişirib satma, amma söhbət onun sanitar gigiyenik qaydalarından gedir. Stasionar yerlər hamısı qeydiyyatdadır, sonra dönər köşkləri var, onların bəzilərində peraşki bişirirlər, qeydiyyatdan keçmiş, tibbi müayinədən keçmiş təyin olunmuş yerlərdir. Stasionar da olsa, onlarda kustarnı formalar öz-özünə yığışacaq, əhalinin mədəni səviyyəsi yüksəldikcə, maddi rifah yüksəldikcə alıcılıq qabiliyyəti də daha sivil formaya yönəlir.

Qeyd edək ki, yay aylarında havaların isti keçməsi ilə əlaqədar zəhərlənmə hallarının sayı digər aylara nisbətən daha çox artır. Bunu Bakı şəhəri Təcili və Təxirəsalınmaz Tibbi Yardım Stansiyasının operativ və hospital işlərin təşkili şöbəsinin böyük həkimi Zemfira Vahidova deyir. Onun sözlərinə görə cari ilin  iyun ayının birindən avqustun 2-nə qədər qida zəhərlənmələri ilə bağlı 294 müraciət qeydə alınıb. Onlardan 253-ü xəstəxanaya yerləşdirilib.

Öncəki xəbərNövbəti xəbər

Bir cavab yazın

Sizin e-poçt ünvanınız dərc edilməyəcəkdir.