“Adətən prezident seçkilərinin Amerika iqtisadiyyatına hər hansı strateji təsirləri olmur”.

Bu sözləri GSR.fm-ə müsahibəsində Neft Araşdırmaları Mərkəzinin rəhbəri İlham Şaban deyib. O bildirib ki, Amerika iqtisadiyyatının 90%-dən çoxu özəl sektordan ibarətdir:

“Amerikda biznes və siyasətin bir-biri ilə əlaqəsi yoxdur. Amerikanın biznesi, iqtisadiyyatı özünün yolu ilə gedir. Dövlət başçısının dəyişməsi iqtisadi kursun dəyişməsi demək deyil. Amerikanın dövlət başçısı seçilməklə ölkə daxilində və xaricində onun hansısa iqtisadi kursunu kordinal və hətta böyük  mənada dəyişmək qüdrətində deyil. Çünki Amerika iqtisadiyyatı 90%-dən çox özəl sektordan ibarətdir”.

Amerikanın neft hasilatından da söz açan İlham Şaban qeyd edib ki, Amerikanın neft hasilatında gələn il dəyişiklik ola bilər:

“Neft hasilatı hazırda 8,5 milyon bareldi. Yəni, neft hasilatı bu il 100 min barel artıb. Bu, əsasən də ilin ikinci  yarısında neft qiymətlərinin artması ilə bağlıdır. Ancaq gələn il üçün bu neftin qiymətlərindən asılıdır. Proqnozlar ondan ibarətdir ki, neftin qiyməti ilin birinci yarısında artıma doğru gedəcək. Bu da ondan qaynaqlanır ki, ilin sonunda OPEC-in Vyana konfransında yeni kvortalar müəyyənləşdiriləcək və 2008-ci ildən sonra OPEC ilk dəfə olaraq kvortalarını dəyişmək haqda qərar verəcək. Bu, bazarda neftin qiymətlərinin artımına təsir göstərməlidi. Nəticədə Amerikanın bir çox hasilatçı şirkətləri bundan ruhlanıb hasilatı artırmağa davam edəcəklər. Bunun nəticəsində hasilatın artımı Amerikada davam edəcək. Ancaq bir müddət sonra bu Amerikada idxalın azalmasına və həmin neftin dünyanın başqa ölkələrinə yönəlməsinə gətirib çıxaracaq. Bu da dünyada neftin qiymətinin azalması ilə nəticələnəcək. İlin ortasında neftin qiyməti yenidən aşağı düşməyə başlayacaq. O zaman Amerikada neft hasilatı təqribən 100 min barel azalmağa doğru yönələcək”.